ورا كل رحلة مريحة ويا رحّال، اكو فريق يشتغل على مدار الساعة حتى يوفر أسهل وأفضل تجربة للمستخدم. وهنا يجي دور مكتب رحّال، برنامجنا التدريبي الي راح يخليك جزء من هذا الإنجاز.
البرنامج صممناه خصيصاً للطاقات الشبابية العراقية الي تطمح تتعلم، تبدع، وتنتج ويا فريق من الخبراء بمختلف المجالات. فإذا چان عندك طاقة، وروح إبداعية، ومستعد تبدي وتشتغل بيدك وتطور مهاراتك، فهذا البرنامج إلك!
شنو هو مكتب رحّال؟
بهذا البرنامج، انسى المحاضرات النظرية المملة الي ما بيها تطبيق عملي!
ويانا راح تشتغل بيدك من أول يوم؛ راح تنتج، تصمم، وتكون جزء أساسي من فريق عنده أهداف حقيقية يشتغل حتى يحققها كل شهر.
وبالنهاية؟ راح تتخرج وعندك مجموعة أعمال تقوي بيها الـ CV مالتك، وتكون نماذج لشغل عملي حقيقي تفتخر بي وين ما تروح.
تدريبنا بمكتب رحّال بالضبط يشبه موسم البرتقال.
فترة متروسة طاقة وحيوية، وممكن تحس بيها بشوية فوضى وتحديات بالبداية. بس من توصل للنهاية وتحصد الي زرعته، راح تتأكد إنو كل لحظة چانت تستاهل.
شنو راح تسوي بهذا البرنامج؟
- تكتشف رحّال عن قرب: راح تشوف شغلنا اليومي بعينك، وتعرف أهدافنا، وشلون نطبق قيمنا على أرض الواقع.
- تاخذ جولة بالأقسام: راح تتعرف على كل أقسام الشركة، وتفهم شلون تتكامل وتشتغل ويا بعضها.
- تتخصص وتنتج: كل متدرب راح يركز بقسم معين، يشتغل بي بيده، ويطلع إنتاج حقيقي.
- تشتغل بروح الفريق: راح تتعاون ويا متدربين مثلك بالبرنامج، تتشاركون الأفكار وتتدربون سوية.
- تحل المشاكل الحقيقية: راح تعيش تحديات ومشاكل الشغل الفعلية، وتتعلم شلون تفكر وتحلها.
- تعيش أجواء الشركات: راح تداوم ويانا بالمكتب، وتشوف طبيعة بيئة العمل الاحترافية بشكل يومي.
- تحقق أهدافك: راح يكون عندك المساحة، الصلاحيات، والموارد حتى تحقق أهداف شخصية وتطور مهاراتك الخاصة.
هذا البرنامج المن؟
- للطلاب والخريجين العراقيين: الي عدهم الوقت والالتزام للدوام 3 أيام من المكتب، ويومين أونلاين.
- للي يدورون خبرة حقيقية: سواء چنت خريج جديد تدور خبرة عملية تبدي بيها طريقك، أو عندك خبرة بسيطة وتريد تصقلها وتطورها.
- لأصحاب الطاقة العالية: الناس الي عدهم شغف وحماس للشغل، بس بعدهم ملاگين المكان الصح الي يستثمر طاقتهم.
- للي يبنون علاقات: أي شخص يطمح يتخرج من هالبرنامج وينضم لشبكة علاقات واسعة ومحترفة تفيده بمستقبله.
- للي ما يخافون من الغلط: ندور على ناس مستعدة تغلط حتى تتعلم، تحاول، تبدع، وتكتشف الحلول بنفسها.
معايير القبول
- العمر: من 18 إلى 25 سنة، سواء چنت طالب أو خريج.
- الموقع: من العراق، بشرط تكون عندك إمكانية الحضور الفعلي لمكتبنا ببغداد، أو تشارك بالشغل الميداني وقت الحملات.
- الخبرة: تمتلك خبرة عملية بسيطة وتطمح تطورها.
- اللغة: تگدر تتواصل وتحجي عربي وإنجليزي بصورة مفهومة. مو شرط بطلاقة، بس لأن أغلب تواصلنا الداخلي بالشغل يكون بالإنجليزي.
- التفرغ: عندك وقت كافي وتفرغ يخليك تستفاد من كل تفصيلة بالبرنامج.
- الشخصية: ندور على شخص مهذب، محترف، يحترم قوانين العمل، وعنده استعداد كامل للتعلم.
رحّال موجود حتى ينطي راحة البال للمسافر العراقي. ومكتب رحّال هو المكان الي بيه هذا الوعد يصير حقيقة. جيب همّتك وقدّم هسه.
